金融海嘯一周年，環球經濟仍喺低谷徘徊，但金融市場已跑先一步，內地上海A股更一度由低位急升一倍至3600點高位，近期喺3000點上落，新股亦再次熾熱起嚟。
旗下基金回報逾75%
水漲船高，基金經理又再次過其風光日子，今年熱衷投資新股同A、H股嘅西京投資董事長劉央（圖），噚日就滿面春風，穿梭於中國全通（633）嘅掛牌儀式酒會，仲好高興咁同記者分享佢今年嘅投資戰績。
着住搶眼綠色外衣嘅劉央話，今年頭8個月，旗下基金回報升幅達75至105%；家陣旗下基金規模達到30億美金，當中約三成係今年新錢。佢嘅客戶好國際化，包括服務咗6年嘅挪威中央銀行；滙豐資產亦係佢個客，雖然為對方經營嘅基金喺07年7月股市高峯期成立，一度經歷難苦時刻，但今年呢隻基金亦錄得90巴仙回報。難怪有人話劉央有資格做「中國女股神」啦！