除咗C朗之外，前日喺歐聯仲有3個奇人威到盡；當中首推忽然正選而包辦兩球，助AC喺C組贏馬賽2:1嘅恩沙基。AC副會長加里安尼賽後話，隊波有種喺歐聯發威嘅DNA；計我話，應該捉呢個36歲老兵去驗DNA，驗吓佢入球觸覺何處來至真。歐洲足協資料顯示，恩沙基以68球暫列歷來歐洲賽首席射手，歐洲入波王當之無愧。
恩沙基入兩粒冠歐洲
AC之前衰到貼地，今次冇用亨特拉爾打正選，改由「基佬」掛帥，而朗拿甸奴位置亦由施多夫取代；結果，恩沙基加施多夫就產生化學作用，兩球波都係施多夫助攻畀恩沙基射入。唔係我求大俠偏心，想知咩叫射手本色，睇「基佬」點樣搶點成功射成2:1就得喇！由迪甘斯領軍嘅馬賽，一度由軒斯扳平都冇用，開季以嚟首次輸波。
恩沙基賽後話，享受足球樂趣係佢成功秘訣，同時又將勝利獻畀一個剛去世嘅小朋友：「早排貝盧斯科尼盃，我將件波衫送畀一個叫盧卡嘅病童，我好想將今場勝利同我嘅微笑送畀現已逝世嘅佢。」原來恩沙基近年經常探訪患有絕症嘅兒童，睇佢花花弗弗原來積極行善，似乎真係好人有好報。
「基佬」唔止幫病童，仲幫埋教練李安納度；話晒佢帥位不穩，呢場波佢喺場邊好緊張，終於嗌到失聲，要由助教泰索迪代佢出席賽後記招。呢場勝利，斷估令李安納度減少啲壓力啩。
新丁、壽星仔發威
另外兩個奇人都嚟自德甲，禾夫斯堡前鋒加菲迪以歐聯新丁身份，對莫斯科中央陸軍連中三元，幫球隊喺B組贏3:1；至於剛喺禮拜日（13號）度過20歲生日嘅拜仁中場湯馬士梅拿，繼上場聯賽對多蒙特梅開二度後，前日喺A組贏海法馬卡比3:0場波又梅開二度。一個老兵、一個歐聯新丁，加埋一個壽星仔發威，今季歐聯首個賽日，果然係奇人天下。