銀行股全線領漲，帶動港股再創一年新高，收報21402，大市成交增至699億元，升勢有成交配合，好友今次攻勢睇落比較有誠意。港股破頂後，21000成為短期主要支持位，好友料趁國慶前，先攻22000關。
一線重量級股份全面上升，排隊上市的新股亦係散戶目標，相比之下，最憔悴係二三線股。不過，通常炒完重磅股後，細價股好快就會跟炒。大市近期屢破一年新高，但唔少細價股無乜炒過，明顯落後大市，只要資金留戀股海，肯定會擇肥而噬，細價股稍後有機會成為股海焦點。
首站看0.164元
嘉華系及遠東系昨日俱見炒上，另一本地老牌企業麗新系，除豐德麗（571）升9.4%，見1.40元外，其餘表現仲係好含蓄，短炒有留意價值，昨日豐德麗已見異動，不妨留意與該股互控股權的麗新發展（488），該股昨升2.4%，收報0.13元，升勢只屬熱身，仍未見真章。
麗展每股資產淨值高達0.50元以上，現價有值博率，伺機吸納，以今年高位0.164元為首目標，暫不設止蝕。
方星俠