好日「090909」長長久久，大家收到幾多個「紅色炸彈」？八方慶幸冇受到襲擊，今個月唔使預多筆使費做人情，下年「101010」十全十美吉日，卻未必咁好彩。好多人收到帖都盤算應該做幾多錢人情，「生活易」網站首度做「公價」人情網上民調，發現去酒店飲公價人情800蚊，去酒樓冇咁闊佬，畀500蚊啫，相差六成！
望收支平衡免倒貼
呢個調查7月底進行，有3,600幾人參加，八成人話同新人交情深淺係決定畀幾錢人情關鍵因素，如果係至親好友，會捨得畀多啲，平均做人情800蚊，如果喺酒店擺酒，最多會畀成千蚊人情；同事泛泛之交，平均做600蚊人情左右，如果去酒樓飲，認為封500蚊禮金就夠。
做人情應該講心，不過家陣結婚好難唔講金，因為整個婚事開支閒閒哋幾十萬元，擺酒係重頭戲，萬一計錯數入不敷支確係幾閉翳，如果算到盡，可以從中獲利就真正人財兩得嘞。網站為新人計算出擺酒封蝕本門數字，如果喺酒店擺酒，每席酒約9,540蚊就可望收支平衡，酒樓就低啲，6,700蚊就打和，貴過呢個價錢有倒貼風險，如果酒席成本cheap啲，仲有機會賺一筆㖭。
呢個擺酒賺錢方程式，背後有個假設係要請多啲親戚好友，少請同事或者萍水相逢路人甲乙丙，否則到場嘅都係孤寒做人情者，埋單時就知味道，至於咁樣向親戚朋友屈機有乜後果，見錢開眼嘅新人自己衡量。
去酒店飲要做成800蚊人情，係咪真係所謂「公價」呢？八方詢問同事、朋友非正式統計，發現不論係去酒店或酒樓飲喜酒，多數人都認為「公價」人情係500蚊，可能物以類聚，八方身邊人多數「寒」底啦，原來其他網民亦唔係太闊綽，有人話人唔到禮到就封200蚊利是，去飲就添多100蚊，「以現在經濟環境，呢個價好合理。」
話晒去酒店飲，畀幾百蚊人情似乎寒酸啲喎，不過有人認為喺邊度擺酒係新人自己決定，冇理由去五星級酒店飲就要親友畀多啲人情「補貼」婚宴。
mailto:[email protected]