荷李活巨星韋史密夫（WillSmith）今年打本翻拍80年代功夫片《龍威小子》（TheKarateKid），改名為《功夫小子》喺中國取景，仲由佢嘅11歲大仔積頓（Jaden）同成龍擔正演出。
最近劇組從北京移師到湖北嘅武當山取景，日前記者影到積頓同成龍拍攝一段練武場面，年紀輕輕嘅積頓耍起功夫上嚟似模似樣。
當日成龍留鬚飾演積頓嘅師傅，喺嗰幕戲中，成龍利用兩條長竹控制積頓雙手，向佢傳授功夫步法。雖然積頓為演出而學功夫只有短短日子，但現場所見佢嘅動作都幾流暢，功架十足，難怪成龍之前大讚積頓比佢個仔房祖名更有武術天份。
老竇笑咪咪
至於擔任《功》片監製嘅韋哥，做埋跟得老竇落片場陪囝囝拍戲，以光頭look現身嘅韋哥笑容滿面，睇嚟對積頓嘅表現好滿意。