指數上返21400樓上，除咗超強勢內銀股之外，上次高位接貨嘅仍是蟹蹤處處。有觀眾來電一心希望仙人指路，抄低出入市位就妄想得道成仙，對自己辛苦賺嚟嘅血汗錢咁輕率，遂報以當頭棒喝，希望仲可以鬧得醒。
老實講，每日喺金魚缸出入有幾個係真正股神吖？既然冇把握，何不將風險減至最低，多花點時間了解公司業務才入市？聽股評唔會致富，但可避免跌入各類技術走勢、財技以至炒供求等圈套，只要食正大浪，唔差在一兩個價位。
以配售形式上市的中國生命（8296），打風天得半日市竟升76%，不料炒友一吹雞，6分鐘內人踩人，沽盤趕住喺收市前要錢唔要貨，繼出現「射擊之星」向淡訊號後，有人仲以為股價可以長升不跌，終於被狗頭鍘侍候。
呢間殯儀公司頭4個月都只係賺500萬元，粗略估佢生意穩定，全年咪最多賺嗰千零萬，點孭得起過14億元市值。橫掂係賭，不如考慮112倍PE嘅電動車，甚或合埋眼追20倍槓桿就收回嘅牛熊證。
唱通街事必有因
講開電動車，股神話咗唔增持，市場繼續將佢推上又一新高，「唔怕你癡、唔怕你呆，至怕你唔來」，總之到你一個忍唔住引誘一來就落閘，有如進入曱甴酒店。同樣係食股神效應，最近有上海掛牌、內地最大的西服出口商大楊創世。
話說大楊30周年獲畢菲特3分鐘DV片賀壽，大讚佢嘅西裝好着，仲話自己有9套，係大楊嘅出色推銷員，又話微軟老闆蓋茨都係捧場客。大楊老闆娘李桂蓮梗係食住上，爆響口話股神有意入股，結果股價連續升停板，股神號召力果真非同凡響。
大楊老闆娘原來喺前年股神到訪大連時，主動要求幫佢做衫，慳家嘅股神當然受落，事後寫信畀大楊讚好着，結果就被人放晒上網。最近老闆娘參加巴郡股東會，飛撲施以擒拿手，將股神一擁入懷，呢張孖公仔親熱照自然又被擺上枱。
股神手影向來密實，中石油（857）係因為增持過咗股權披露要求至露底通晒天，大楊西裝雖有前Armani首席設計師IvanoCattarin坐鎮，但去年只係賺幾千萬，點解會值30多倍PE；若然真有股神入股計劃，明知股價將以倍數升，點解要咁早唱通街益街坊？
胡孟青