老牌紅籌股北京控股（392），前主席衣錫群喺上個月榮休，華華仲以為同唔到佢講拜拜，點知噚日業績記者會上，佢突然走出嚟講吓離別感受。佢話其實都有唔捨得，但當諗到唔使再回答記者朋友嘅尖銳問題後，其實退休都相當唔錯喎。
衣錫群話，唔好睇少每次開記者會嘅事前準備，真係要做好多準備工夫o架，雖然喺1999年加盟北控以嚟，大大話話都做過近20次業績，但都仲好緊張喎。佢話退休後暫時未決定會做乜嘢，但應該會搵啲自己願意嘅嘢嚟做。退休喎，唔通又朝九晚五咩？
至於佢嘅接任人、做過北京市政府國資管主任嘅王東，話會繼續以盡量將股東回報最大化為己任，冇話因為佢相對年輕（44歲），北控就進取啲咁喎。華華借呢個機會，祝衣錫群退休生活愉快，唔使掛住我哋o架。