好多外流球員到英超發展，首要係要學好英語。好似利物浦嘅西班牙前鋒費蘭度托利斯（費托）咁，就自爆嚟到英格蘭兩年幾，最近啲英文先叫進步少少；費托話全靠佢成日聽《披頭四》（TheBeatles）嘅歌，同埋不時打去二手車行同經紀吹吓水學英文喎。唉，費托，letitbe啦，你入多啲波當補番數囉！
07年夏天由馬體會轉投利物浦嘅費托，講述番當年初到貴境，自己英文水平唔多好；加上利物浦市英文嘅口音出名難聽，所以當時佢去親超級市場買嘢，每次都俾售貨員問到口啞啞唔識回應，好似遇到陌生人侵犯咁，淨係識大嗌：「No！」
為學利物浦口音狂煲
費托越諗越唔對路，冇理由喺英超發展唔識講英文，於是佢好怪咁唔走去聽「靈格風」，而喺聽利物浦最偉大嘅出品——《披頭四》嘅歌當學習。一聽就聽咗兩年幾，費托都只係話大約3個月前，先聽得明啲利物浦英國人同佢講緊咩，算係有進步啦。我求大俠講笑咁講，唔知係咪受費托嘅影響，喺今個月初就翻出咗張有成15隻碟嘅《披頭四》懷舊經典專輯，霎時間又好似興番《披頭四》咁。
仲有呀，費托嚟得英超，利物浦點會唔好好關照佢，專誠請咗兩位英文老師阿倫同樂比做輔導。兩位阿Sir仲吩咐費托，叫佢要打電話去二手車行同經紀傾多啲計，學習吓點樣同人對答嘅技巧喎。哈，「打電話問功課」我求大俠就聽得多，打去車行同人練英文？實俾人話混吉！希望家陣英語再唔係費托嘅煩惱，佢可以大唱「allmytroublesseemedsofaraway」啦！