金融海一周年，浪濤盡多少英雄？八方訪尋各路人物，睇吓劫後餘生情況，結果願意講嘢者，九成九都係自稱好掂識得趨吉避凶之士，例如蘇民峰師傅，呢位股齡逾10年嘅風水大師聲稱，過去一年喺股市搵到食，賺咗15%。
女股民死攬唔放
未講蘇師傅火中取栗心得，先講佢過去一年股海浮沉嘅觀察。據佢非正式統計，金融海下嘅股海生還者女多男少，點解呢？蘇師傅有個感性分析，就係男股民一般比較果斷，願意壯士斷臂止蝕，咁做可能有一時之快，但卻未必可以捕捉到升市而入市獲利；反觀女士炒股相對意氣用事，明明跌到一仆一碌，都寧願死攬唔放，偏偏就係咁，股市極速反彈嘅時候有機會返家鄉，無端端翻生。
根據蘇師傅分析，佢咪蝕到攤攤腰？非也。因為佢自言只賭兩樣嘢，一係股票，二係物業。股票只佔少數，不足身家5%，物業較多，除咗一個住宅，其餘10個物業都係舖位。股票方面，師傅話佢上年恒指萬八點時入過市，後來跌到約一萬點，賬面見紅，但佢淡淡定有錢剩，冇放之餘仲喺今年3月萬一點時再入市，上番二萬點先沽一半貨，唔大貪，好彩獲利15%。
蘇師傅話過去一年買嘅都係國企大紅籌，佢強調自己唔識股票，只係算到今年五行屬水嘅行業大利，所以狂入內銀股。佢話有個八成準嘅秘技算入市時機，就係單數年年頭升年尾跌，雙數年相反，所以佢認為今年恒指年底會跌。不過佢又話呢套秘技唔係十成準，舊年就破咗例嘞。
計地運西區最旺
至於樓市方面，師傅話計過地運，物業升跌12年一個循環，98年開始落，04年開始上，09差唔多到高位，所以佢喺04至06年入貨之後，呢幾年冇再買物業。計地運又以西區物業最旺，佢04年買入結志街一棟唐樓，1,350萬買入，升咗800萬之後放剩地舖。
地舖係蘇師傅至愛，佢曾買住宅放租賺唔到錢，所以家陣只買舖。師傅講到自己逢買必贏，佢話其實都中過招，上年買印度、巴西基金，至今蝕兩成。
mailto:[email protected]