ESPN播嘅《世界體育中心》一向有唔少捧場客，我求大俠都係佢擁躉，噚晚搭正7點坐定定，一心諗住等睇美國網球公開賽費達拿鬥迪樸度嘅男單決賽精華，點知播出街又係日前史施達絲帶住囡囡攞獎嘅美網女單冠軍舊聞。明明一日前睇過，自己仲以為時光倒流，睇耐啲，先發覺半個鐘頭嘅直播節目，同星期一嘅完全一樣，新聞變舊聞，有冇搞錯。我求大俠當然第一時間打畀個喺ESPN做嘅老友了解，先知到原來佢哋嘅新加坡總部發生技術故障，節目出唔切街，諗住晚上9點半播番，點知都搶救無效，佢唯有托我求大俠向受影響嘅觀眾講聲sorry喎。