受次按及金融風暴影響，獅子行滙控（005）股價表現雖然一度傷盡股民心，但滙控飲香江水長大，長情小股東對呢隻獅子不離不棄，年初集團進行世紀供股，香港供股部份便獲得高達98.2%比率嘅股東接納，較集團整體接納率96.6%更高。香江小股民咁支持，管理層好應投桃報李，親自「謝票」。
華華聽聞，繼上月公佈中期業績時，主席葛霖親臨本港主持記者會後，董事會將於下周二至五，假本港召開董事局會議，屆時全體執行董事及非執董都會雲集中環總部。
滙控對上一次喺香港開董事會，已經係3年前即06年嘅事，當時「5號仔」仲未發出世紀盈警，更遑論進行歷史性供股。但正如佢哋亞太區主席鄭海泉話齋，金融海嘯雖然對滙控有冲擊，但冲擊唔到滙控嘅根基。