摩根史丹利一位定息部董事總經理杜軍因知道中信資源（1205）嘅內幕消息，買股票賺大錢，犯咗刑事罪，等候判刑。
呢位內地海歸派三十幾歲，畢業於哥倫比亞大學，點解會咁笨o架？經濟Ｌ畢業於哥大經濟系，睇報紙知道呢件事之後，猛咁搖頭：「乜佢係校友嚟o架？一年薪酬連花紅有一千九百萬元，做乜搞呢啲嘢呀？好蠢啫！」有數得計，杜軍內幕交易賺咗三千三百幾萬，唔夠兩年薪酬，睇怕以後全世界冇銀行/證券行會請佢，亦好難自行在證券界創業，將來必須轉行，打乜嘢工可以賺千九萬一年？
呢件事我哋有一段情節好唔明嘅，就係杜軍在二○○七年六月五日被大摩炒魷之後，與太太走咗返北京，證監會插手調查，無法與佢聯絡，《金融時報》講，杜軍住在北京一處軍人住宅，所有外間來信都一一退回，保安甚為嚴密，證監會根本冇佢符。點知杜軍於二○○七年七月十日因事回港，用香港身份證過電子通道，右手大拇指一按下去，玻璃閘門唔開，佢不以為意，等咗十零秒，移民局人員與警員已站在佢眼前，將佢拘捕。杜軍為乜事回港？據說為咗取回在大摩辦公室內之一個空氣清新機與住宅單位內之一幅現代畫，左丁山與幾位老友討論案情之時，幾大都唔信。空氣清新機值乜錢呀？現代油畫又唔係甚麼大師作品，行貨啫噃！世事往往好奇，唔通有鬼遮眼？
銀行家現在無不人人揸住部黑莓（BlackBerry），分分秒秒收電郵，睇電郵，發電郵。杜軍辯稱佢自己冇睇過大摩發出之電郵指示，限制職員買賣中信資源。但原來用家每次按掣，黑莓都有紀錄，專家可以檢視出嚟做法庭證據，杜軍嗰部黑莓就顯示到佢曾經按掣，email有人睇過，於是杜軍百辭莫辯。銀行派部黑莓畀職員，除作通訊用途外，實際上亦可透過黑莓紀錄職員之一切公事活動，個人毫無私隱可言。如杜軍者，身居要職竟然利用內幕消息賺錢，斷喪大好前途，而懵然不知一切交易資料盡在公司掌握，令人百思不得其解！