香港回歸，政府部門推行本地化，能夠晉升警隊權力核心嘅處長級外籍人員買少見少，03年晉升為高級助理警務處長嘅杜偉義（MikeDowie）應該係搭升職尾班車嘅人之一，連以前事頭婆都喺05年頒OBE勳銜表揚杜Sir。
與潮州老婆好恩愛
呢位警隊最高級外籍警官上星期五退下來，外籍高層又少一人，家最高級管理層僅餘助理處長（支援）嘅顧履勤（AustinKerrigan）係外籍人士，同回歸前幾乎清一色外籍警官有天淵之別。
杜偉義來自蘇格蘭，19歲離鄉別井來港當差，一做37年，落地生根，太太係潮州人。杜Sir係出名嘅「黑幫剋星」，蠱惑仔稱佢「卡達菲」，形容佢查案好似利比亞領袖「狂人」卡達菲一樣咁黐線。不過，呢位黑幫剋星卻怕老婆，杜Sir曾經同記者講過佢老婆絕不好惹，並非如外界所諗潮州女人最馴服聽話。雖然係咁，但杜Sir同佢太太結婚34年，十分恩愛。
退休後杜Sir會擔任由警務人員組成嘅奮進行動行政總監，幫助邊緣青少年，同埋教貧困兒童英語。