好有機會喺今屆一級方程式（F1）奪冠嘅巴恩車隊英國車手畢頓（圖），竟然係低薪一族。年薪為300萬鎊（約3,900萬港元）嘅佢，恃住自己喺車手龍虎榜以80分領先（14分放甩排次席嘅隊友巴里哲奴），就爭取將人工加至800萬鎊。外界都認為畢頓係獅子開大口，但佢之前效力已退出F1嘅本田車隊時，為咗救車隊已經自願減薪，由800萬鎊減至家嘅300萬鎊，仲以呢個友情價簽巴恩，所以佢都係收番以前個價啫。更何況，同年薪1,200萬鎊嘅麥拿侖車手咸姆頓，同埋年薪2,500萬鎊嘅法拉利車手拉高倫比，即使畢頓攞番舊價800萬鎊仍然係低薪一族，因此我求大俠亦支持佢咁做。