呂慧儀噚日冒住颱風襲港，拍攝無綫處境喜劇《女王辦公室》，喺一個私人屋苑嘅泳池拍落水戲。呢場戲講呂慧儀同盧宛茵有婆媳糾紛，搞到扮佢老公嘅陳山聰做咗磨心。當兩婆媳相嗌唔好口時，盧宛茵仲問陳山聰，如果阿媽同老婆一齊跌落水，佢救邊個先，話口未完呂慧儀即刻跳落水，仲加幾錢肉緊扮浸親，實行要激到奶奶生蝦咁跳。
請助手揸車
呂慧儀一向索爆，今次以三點式上陣嘅佢話：「我唔想太性感，所以加多條短褲仔，唔係怕走光，不過加條短褲會做得自然啲。」呂慧儀跌落水後，劇情講佢引來幾位狂蜂浪蝶，赤膊大漢將佢大包圍，見佢咁靚女，咪出言調戲一番，搞到陳山聰要落水救妻。
呂慧儀話佢喺水度凍到打冷震，因為打風關係，吹到佢暈暈哋，好在拍攝時未有落大雨，佢話：「拍之前我要企定喺水中央，我已經好凍，點知其他扮泳客嘅港男就行動緩慢咁落水，不過佢哋唔係有心咁慢，因為佢哋唔知要埋位啫。」呂慧儀話佢一take過拍完場戲，不過為咗拍多幾個鏡頭，佢不時上水又落水。
呢期呂慧儀又請咗個助手，原來佢自從上次撞車後好有陰影，唔敢再揸車住，加上佢傷咗頸骨同隻手，拎唔到重物，惟有請個助手揸車，不過都係兼職做住先。