渣打集團（2888）兩度供股集資後，狀態大勇。為咗慶祝150周年，上星期宣佈發行面值150蚊嘅本港法定鈔票，今個星期又有公佈，原來集團將成為英超球隊利物浦嘅主要贊助商，由明年7月起連續4個球季，渣打嘅名同埋標誌都會出現喺「紅軍」嘅球衣上面。
贊助費為利物浦歷來最多
渣打集團行政總裁冼博德（PeterSands）一直係「兵工廠」阿仙奴嘅「粉絲」，渣打點解會贊助對家利物浦呢？Sands話，利物浦係英國最成功嘅足球隊，雖然自己係阿仙奴fans，但係好開心集團可以贊助利物浦，有助提高集團品牌同埋知名度。
利物浦同阿仙奴兩支強隊難免在大賽上對壘，咁究竟Sands係忠於自己喜好，定係支持集團嘅贊助呢？Sands嘅答案就非常玄妙，以一句「不能說的秘密（deepsecret）」輕輕帶過，而且點都唔肯透露今次集團嘅贊助費用，只係話係利物浦有史以來獲得最大嘅商業贊助。
支持邊支球隊係「不能說的秘密」，咁喺內地或印度上市，會唔會有一啲啲消息透露呢？Sands話，渣打經常都會同投資銀行接觸，同時物色喺唔同地方上市嘅機會，上海係其中一個考慮地方，集團喺內地同印度都有業務，無論喺內地定係印度上市都合理，家就未有任何決定。至於以集團本身定係分拆業務上市，佢話傾向以集團整體上市。
李華華
mailto:[email protected]