政府新聞處成立50年，噚日舉行金禧展覽，幾個前新聞處處長都有到場，喺86年至87年做處長嘅陳祖澤話當年，任內印象最深刻係「一紅一白」兩件大事。紅事係英女皇首次訪港，白事則係尤德北京逝世，兩單都係百年一遇大新聞，做處長忙到氣咳。
家陣電腦化時代，新聞處透過電腦發稿㩒個掣就得，陳祖澤話多年前開始用傳真機畀資料傳媒時，啲傳真機紙好鬼貴，傳媒行家都形容係「燒銀紙」，後來佢改革用較便宜嘅紙，大家先冇咁肉赤。新上任嘅康文署署長馮程淑儀都做過新聞處處長，佢未夠老資格話當年，但係話上任後都要處理「白事」，唔係邊個大人物大吉利是，而係康文署公園水池啲福鱷要人道毀滅，估唔到要應付呢啲另類「白事」。