中文大學宣佈，大學校董會主席鄭維健於十月二十五日任滿離任，由鄭海泉接任為主席。鄭維健自二○○三年起擔任中大校董會主席，做滿六年，合乎政府任命規矩。本港大學嘅校董會主席，係校董會提名，請大學監督（即特區行政長官）同意委任嘅，現在盛行六年制，即係做兩任，就要退下來，鄭維健做中大校董會至今，盡心盡力，建樹良多，好多人挽留佢繼續做下去，但鄭主席素來行事守足規矩，唔想破例，中大唯有另覓人選。
新科主席又係姓鄭嘅，中大新亞書院經濟系一九七三年畢業生鄭海泉是也，鄭海泉係滙豐亞太區主席，滙控執行董事，香港冇人唔識，唔使多介紹。要講嘅，就係中大自一九六三年成立，四十六年來第一次有自己嘅產品做校董會主席，足證培養學生嘅成績唔錯，唔講第二啲，起碼中大生之中，出咗一位香港大學校長徐立之（新亞書院生物系一九七二年畢業），亦出一位銀行大班兼校董會主席，加埋無數畢業生做咗大學教授，作育英才有得向納稅人交代啦。新亞書院適逢今年慶祝成立一甲子，已舉行一連串學術活動，壓軸項目會係喺十一月二十九日星期日之六十周年晚宴，在會展舊翼舉行，到時出席嘅中大校董會主席係新亞書院校友，加埋徐立之校長亦會以校友身份出席，特別有意思。
鄭海泉做咗好耐新亞校董o架嘞，○二年之時，佢係恒生行政總裁，新亞校董會曾經想選佢做中大校董，但佢話中大校董會已有恒生銀行副行政總裁陸觀豪在，佢唔想校董會之內有兩個恒生高層，畀人講閒話，故此唔肯做。後來佢調職滙豐，陸觀豪自恒生退休，佢先至願意接任政府委任為中大校董。講起嚟，中大之有今日咁興旺，得到恒生銀行嘅幫助好大，鄭海泉當年報考中大，就要到旺角恒生（彌敦道）之中大臨時辦公室報名，恒生大老何善衡，何添、利國偉、梁銶琚等人歷年不斷捐款，恒生律師關祖堯做過中大主席，利國偉爵士做過中大司庫主席，前UGC主席林李翹在任職恒生期間係中大司庫，接任司庫嘅係陸觀豪，碰巧新任主席鄭海泉又做過恒生，可說中大與恒生有長久情緣。