立法會四川考察團不日出發，由於內地玩嘢，所以好多民主派議員都唔報名北上，結果只有16個議員成行，帶團嘅主席曾鈺成都算有失面子。唔只議員唔畀面，八方知道連記者都冇興趣，據講冇行家報名隨團到四川，現時所知，僅兩份左報派出駐當地記者採訪。
香港記者唔願到四川其實都可以理解，費事又俾人老屈藏毒、煽動鬧事啦，眾所周知四川忌諱豆腐渣工程醜聞被揭，香港記者被阻撓採訪時有所聞，既然四川連泛民議員都唔多歡迎，何況記者？事實上呢個考察團兩日一夜走馬看花，浮光掠影恐怕亦睇唔到好深入嘅嘢，唔去相信冇好大損失。
議員會去都江堰、映秀鎮、省道303線卧龍段及金沙遺址博物館，費用每位5,800蚊，貴過一般旅行團，議員唔去可以慳番一筆公帑㖭。