有啲嘢冇得返轉頭，玩賽車Game行錯半步，又要回起點砌過，因為咁都唔知掟爛過幾多手掣！《Dirt2》呢隻越野車Game就有一個Flashbacks系統，炒車或入彎唔靚都可回到6、7秒前嚟過！現實世界如果有呢個系統……最近嘅馬會喺邊呀？
文：阿洛
回帶系統 心情輕鬆
呢個Flashbacks系統，會喺你炒到架車爛到唔行得時自動回帶，不過……平常都可以用，但就梗係要限次數啦，越高難度回帶次數就會越少，去到高階比賽時，就要靠你自己手車去贏。而且，呢個系統都唔係次次靈，如果你炒車前太過高速，俾你回帶都避唔開炒車嘅厄運，阿媽，太遲喇！
乜車都掂 我要衝線
有冇睇過《我要衝線》，記唔記得赤木軍馬開架泥頭車去同人比賽？《Dirt2》繼承第一代，車種有七大種，除現實各大品牌嘅靚車如三菱EVO、掃把佬外，仲有農夫車等古怪車種。唔同車種性能同耐力都有分別，即係有啲快啲有啲就襟撞。當然亦有育成系統，買架靚車慢慢殺上高階賽事，當中亦有以著名已故Rally冠軍車手ColinMcRae命名的比賽，更會面對極多現實世界中有名有姓嘅冠軍車手。
污糟好閒 架車會爛
等《GT5》等到咩都長，好彩呢隻賽車Game畫面都夠超班！飛沙走石遠景都做得好靚，直情好似旅遊節目咁風光如畫。而且架車炒完都會睇到爛咗個頭定凹咗條尾。仲有連線模式支援8人混戰，我都唔明你哋班友仲喺街度飛車為乜？返屋企開機罷啦！
Profile
遊戲：《Dirt2》
機種：PS3
製作廠商：Codemasters
類型：賽車
人數：1-8人
