謝天華老婆Tina日前聲稱因胃抽筋入院，卻因同時傳出謝天華搭上奀星王璐瑤，故有指夫婦感情不穩，Tina入院另有原因。昨日謝天華和Tina出發到馬爾代夫度假，男方在機場擔抬一腳踢，Tina則騷胸心情靚，問到此行是否箍煲？謝天華不置可否笑說：「咁講都唔係太離譜。」
人紅果然是非多，憑「Laughing哥」上位的謝天華近來新聞不絕，日前老婆Tina聲稱因胃抽筋而入院，結果要留院觀察，加上最近謝天華突然被指搭上奀星王璐瑤，因此即傳出不少傳聞，其中更傳出謝天華和Tina感情不穩，不過日前Tina出院時兩人已拖手澄清。昨日謝天華和Tina出發到馬爾代夫旅行一星期，他們到達機場時，其後天華負責推行李，Tina則以低胸裝示人，謝天華負責把行李搬上運輸帶，粗重工夫一腳踢，十足好老公。
默認度假箍煲
謝天華表示今次去7日，他坦言因為近年工作太忙，未有時間和老婆放假休息，謝天華說：「呢個地方係老婆好想去，自己都想去，今次係老婆安排成個行程，聽晒佢指示，我就冇理過，一早已經plan咗有呢個假期。」不過昨午掛起3號風球，謝天華坦言有擔心掛8號而影響行程，幸好他們的航班下午起飛，故影響不大。
有傳此行為箍煲，謝天華聞言笑笑口說：「我冇聽到喎，人哋要講乜我冇法子，不過咁講都唔係太離譜，最緊要讀者明白就OK。」會否希望遠離是非？謝天華說：「冇人會鍾意有是非，希望可以告一段落，我唔鍾意糾纏咁耐，唔想嘥時間去處理是非問題。」謝天華又透露老婆身體非常OK，不過也有帶備藥物以備不時之需。
懶理奀星爆料
談到王璐瑤被指自爆緋聞，謝天華一聽到對方名字即封口說：「呢位女士嘅新聞，乜嘢我都唔會回應，一切已交由律師處理。」會否透過法律途徑禁止對方再亂爆新聞？謝天華再表示不想多作回應，Tina隨即挽着他的手入閘，離開時還向記者揮手。
採訪：張俊銘
攝影：彭琮然