前特首辦主任陳德霖即將入主金管局，成為「獨立王國」嘅最高領導人。攞命陳可以走到呢個事業高峯點，固之然應該感謝「栽培」佢嘅任總，而佢曾經紆尊降貴喺特首辦踎咗幾年，都係難得經歷，佢禮數周到，近期喺某俱樂部筵開三圍，宴請曾經同佢共事過嘅特首辦中人出席慰勞宴，八方聽聞菜式好豐富，攞命陳總算冇待薄呢班幫佢捱過唔少子彈、有辱無榮嘅同僚。
雖則話係慰勞宴，據聞新特首辦中人都係座上客，八方唔係心戰室成員，當然冇份送舊迎新，只知赴宴嘅人個個都捧住個肚離開，好滿足咁讚攞命陳招呼周到，原來攞命陳仲體貼到為來客安排咗飯後卡拉OK，讓大家憑歌寄意話別，但大家可能飯氣攻心懶得開口，食完飯齊齊鬆人，一支歌都冇唱，枉費攞命陳一番心思。