以生產快譯通辭典機出名嘅IT界議員譚偉豪，噚日同記者分享對香港創新科技睇法時，突然攞出本書《山寨來了》出嚟，指內地唔少山寨貨其實好創新，有啲手機設計到成個煙盒咁，可以裝五支煙仔；有手機更集合多功能，可以用嚟分辨假銀紙。
IT豪大讚呢啲山寨機功能合乎強國國情，香港搞創新科技應該效法，又話香港都可以從中搵到商機，就係協助山寨廠將土炮設計申請專利權，咁就唔怕再俾人指係抄襲或老翻，可以行銷全世界。唔少在場記者可能領悟力有限，都認為「山寨」根本係「創新」嘅反義詞，合法化劣質老翻，又點會係搞創新科技？譚偉豪解釋近半粒鐘，最後用四個字總結，即係香港、深圳要「分工合作」，唔知大家又明唔明？講到山寨貨咁犀利，快譯通有冇計劃效法呢？