八號風球打到嚟，疑似特首候選人梁振英喺香港政壇刮起嘅風暴則波及台灣。話說台灣新行政院長吳敦義9月5號秘密來港，事後佢只透露此行係參觀香港土木工程拓展署，取經如何防止山泥傾瀉（台灣稱為土石流），佢返台後即時向總統馬英九建議效法香港設立預警機制，一發現有險情即刻通知村民撤離，希望可以防止再發生活埋村莊慘劇。
吳敦義冇要求見煲呔
國民黨回朝，台官訪港唔係好特別嘅事，不過台灣親綠營傳媒爆料，指吳敦義香港行仲有個秘密節目，就係暗中同「下屆特首熱門人選」梁振英見面，由於梁振英親北京色彩濃厚，疑似中共地下黨員又水洗唔清，民進黨質疑吳敦義做行政院長前訪港，名為公務考察，其實係透過梁振英向北京交代新內閣人事安排，批評國民黨官員竟然要向中共幹部報告工作，係自我矮化為地方政府，官員任命都要北京批准，要求吳敦義從實招來。
民進黨係咪借題發揮，大家可以自行判斷，八方反而覺得綠營可能太睇得起梁振英，就算佢真係黨員，都不過係小小特區一個幹部，可以管埋對台事務？西環都只係敢做「第二支管治隊伍」，唔敢亂碰對台問題，梁振英唔通想架空埋國台辦？話雖如此，呢次風波其實反映梁振英又紅又專背景無人置疑，更有趣嘅係台官訪港唔見真正特首，當煲呔透明，又唔見另一特首熱門唐英年，獨見梁振英，唔通對岸都認為梁振英值得睇高一線？
特首辦發言人話由於台灣官員冇要求，所以冇安排見特首。梁振英則證實曾與吳敦義見面，佢同八方講，8月訪問台灣時，不幸發生8.8雨災，同當時係國民黨副主席嘅吳敦義見面時，談及香港幾十年前山泥傾瀉頻生，後來落實多項改善措施，所以近年大規模傷亡事故減少，對方認為香港經驗值得參考，所以來港考察。
梁振英又話吳敦義以前來香港時也曾見面，所以佢到台灣時順道拜會對方，而月初吳敦義訪港時，並冇透露佢將會出任新職位，兩人只係談及台灣災情同重建工作，冇講政治話題，佢樂意向其他人士介紹香港情況。呢次疑似「黨對黨」接觸係咪咁純情呢？當事人心知肚明。
mailto:[email protected]