首位將洗腎技術引入香港嘅余宇康教授，聯同太太雷覺雲兩夫婦捐出5,000萬元畀港大感染及傳染病中心，港大答謝余醫生夫婦，將中心以余太芳名冠名。富商冠名醫學院好大爭議，呢個命名應該打風都打唔甩，因為港大喺8號風球橫風橫雨下都堅持舉行命名典禮。
余醫生港大醫學院校友，今次捐錢支持研究新傳染病同埋致病微生物，亦係回饋母校，中心總監何栢良話會將捐款用於訓練醫護人員，同埋研究新傳染病，因為傳染病日新月異，所以研發疫苗同抗生素抗藥性等問題不能鬆懈。
噚日仲有個特別節目，就係食物及衞生局副局長梁卓偉到場彈奏生日歌為余太慶祝生日，全場齊唱生日歌，好有歡樂滿東華feel，梁副局音樂造詣好高，係達職業水平指揮家，抽空娛賓，賓主共歡。