我求大俠見過唔少寸爆之人，但好多時都係得把口，好似艾迪巴約寸得嚟又夠膽做就真係未見過。呢位效力曼城嘅前鋒喺踩傷阿仙奴前鋒尹佩斯同挑釁兵工廠球迷之後，雖則面臨停賽6場（3場加3場）處分，不過仲死唔收口，話急不及待喺次循環到阿聯酋球場，再同阿仙奴球員同球迷過招。
隨時罰停賽6場
今夏由阿仙奴以2,500萬鎊（約3億2千萬港元）過檔曼城嘅艾迪巴約，喺上個禮拜六贏阿仙奴4:2場英超上，先係「意外地」踩傷前隊友尹佩斯塊面，之後再喺入波後疾走90碼跑去阿仙奴球迷區慶祝。雖則做咗兵工廠嘅頭號敵人，不過佢就話未驚過，仲話對下年4月24號作客對阿仙奴嘅次循環英超充滿期待：「我會踢次循環喺阿聯酋場英超，我根本驚都未驚過。點解我唔可以踢呀？我家係曼城球員，如果佢哋派我落場，我就一定會踢。」
兵迷掟凳職員當災
之但係，艾迪巴約呢兩個過火同埋挑釁行為就令佢有手尾跟，若然英足總真係秋後算賬，每項罪名各停3場，佢就有可能被重罰停賽6場，但寸爆嘅佢同英國《太陽報》咁講：「我唔知道自己做錯咗啲乜而搞到要被罰停賽。我冇聽過警察或者英足總方面就呢兩件事搵我傾。球會方面亦冇任何意見。」
咪話我求大俠唔提醒艾迪巴約，曼聯後衞加利尼維利喺06年英超主場贏利物浦後，走去紅軍球迷區慶祝，結果被罰停賽兩場及罰款5,000鎊。更何況，佢走去挑釁阿仙奴球迷，搞到阿仙奴球迷發晒狂，猛掟雜物落草地，據了解仲誇張到連凳都有張。艾迪巴約佢冇中「頭獎」，但就殃及池魚，在場一名職員被一支半滿嘅汽水擊中頭部，仲一度冇咗知覺，好彩送院後冇大礙。艾迪巴約整舊蘇州屎出嚟，英足總唔搵佢算賬就假。
嚟緊喺本月20號會上演曼市打吡，曼城會作客對曼聯。曼城已有羅賓奴長唞，辛達告魯斯同泰維斯就上陣成疑，入波責任落晒喺艾迪巴約度；我求大俠希望艾迪巴約咪再咁多口水，專心備戰呢場大戰，踢場好波好過啦。