賭王跌傷留醫好一段日子，康復進度同賭局一樣，一日未揭盅都十分迷離，雖然二房眾口一詞賭王持續好轉，不過近日仍然有雜誌話賭王仍處昏迷狀態，蘇醒機會唔大，即使蘇醒亦極可能半身不遂，甚至可能要再做手術開窿插喉，八方噚日見到超蕸，佢就唔係咁講法。
可以喺醫院做運動
信德捐50萬元贊助公益金國慶千萬行，身為信德執行董事嘅超蕸噚日代表賭王出席中總頒贈感謝錦旗儀式，活動後佢好大方咁詳談賭王身體情況，指賭王目前狀況「幾好」，唔單止已經落得床，甚至可以喺醫院做運動踩健身單車。
前日馬季開鑼，超蕸話父親冇睇馬，「可能冇佢隻馬出，咪冇興趣睇囉。」賭王跌傷頭，超蕸話睇唔出賭王記憶力受影響，又話父親好留意新聞，連娛樂圈是非都有追，「我哋八卦劉德華結咗婚畀佢聽，佢話『吓！』」估唔到賭王對八卦新聞都咁有興趣。
聽超蕸咁講，賭王復原進度十分理想，應該好快可以出院公開露面，不過超蕸又話未得住，話父親家「好合作」，冇要求出院，「佢自己知道要多啲時間去慢慢休息。」又指賭王仍未完全康復，「佢家都有落床，但身體係咪100％康復晒，就梗係唔係啦，唔可以咁講。」佢亦唔知道幾時先完全康復，「我唔識答你，我唔係醫生。」
賭王二太藍瓊纓發功，二房連日向外透露賭王病況有好轉，儼如家族嘅發言人，有人話係反映二房已經取得病房話事權兼話語權，其他幾房人都要講少句嘢。