澳洲首富ClivePalmer旗下RDI（ResourcesDevelopmentInternational）計劃捲土重來，趁IPO熱潮集資超過300億元，足足係今個月所有新股集資規模的一半，亦係歷來第7大新股。
呢位來自昆士蘭嘅礦業大王，貌似洪金寶，為人極之低調，原來身家有15億澳元，亦係當地被喻為「澳職曼城」的黃金海岸聯隊班主，又搞波又搞慈善，搵錢之餘亦造福社會。
未等到RDI來港上市，先有一隻疑似礦業股的中冶（1618）正在招股，但反應唔及聲勢浩大的國藥（1099）。國藥係全國最大藥品分銷商，雖然毛利率只約8%，仍吸引唔少大孖沙如四叔、寶哥哥、阿里的爸爸、西京劉央等垂青。劉央開到聲話28倍PE貴，但就照買；華南城（1668）上市炒影子又炒錯華僑城（3366），充份反映無論大戶定老散，樂觀情緒早已冲昏頭腦，全城投入「勁抽」行列。
抽時抽，但要識得計數。國藥已超額幾十倍，入大飛都唔分得幾多，正如四叔話齋，新股冇肉食。唔借孖展反而隻隻抽一手當買六合彩，慳息之餘，隨時中籤率仲高。
四大業務分散風險
名人效應短暫，基本因素至係內功。國藥做分銷，但藥業股除咗中國製藥（1093），盈利普遍都未得，做藥嘅唔好，賣藥嘅又好得去邊？睇番中冶，雖然目前八成業務係做建設，但原來佢有全球第二大未開發銅礦––阿富汗艾娜克銅礦的75%開發權，根據招股文件，銅含量比起早前報道嘅仲多，預計年產量可達98.7萬噸，前期工程已展開，預期2011年下半年試車投產、2013年整體運作。
呢個投資42億美元的大製作，阿富汗視之為金礦。因為項目完成後，每年總產值可達12億美元，佔當地生產總值47%！雙方同意將年產量暫定喺30萬噸，相當於每年中國進口量五分之一。不過當地政局仍然動盪，大選後美國正考慮增派駐守當地兵力，因為單係8月大選月，就有47名美軍在當地陣亡。
有危先有機，中冶計劃到2013年將資源開發所佔比重提高到15%，但主業仍係建設、房產開發等，有助分散風險。Palmer的致富之道係不斷買地買礦，只要買中一塊好嘢就足以食糊。中冶業務叫緊「四飛」（工程承包、冶金裝備、採礦及房產），只要美國佬唔割禾青或反枱，隨時自摸位位爆棚。
胡孟青