郭富城昨日揚威賽車場，本報狗仔隊經常追訪明星名人，對他們的駕駛技術瞭若指掌，郭富城的確駕駛技術一流，而錢嘉樂、張智霖、余文樂和沈嘉偉等也技術良好。擁法拉利、林寶堅尼及保時捷等靚車的城城，不時會駕駛名下靚車出外試車，因其靚車全都馬力十足，狗仔隊往往追車追到氣咳。
女藝人方面，以張栢芝和李珊珊的技術較佳，前者揸車或泊位均快狠準，後者相信是受前男友錢嘉樂影響，駕駛技術有番咁上下。
至於圈中駕車技術欠佳的，則有黎明、謝霆鋒、湯盈盈、徐淑敏、官恩娜和佘詩曼等。記者曾目睹黎明駕法拉利到跑馬地泊街位，結果扭了10幾手軚也入不到位，霆鋒、佘詩曼和湯盈盈經常炒車，湯盈盈連駛出停車場也會擦花倒後鏡，駕駛技術如何水皮實在毋須多講。
徐淑敏則是超級路盲，不認得路兼沒方向感，經常往相反方向駕駛，而官恩娜揸車時極度騰雞，不時因開得慢而被尾隨車輛狂「砵」。
撰文：葉雪