歐洲股神安東尼波頓（AnthonyBolton）嘅投資絕學好多人都想學，但估唔到後繼無人。華華早排訪問咗波頓，問佢點樣向3名仔女傳授投資心得同經驗時，股神竟然面露失望神情，仲長嘆一聲，好黯然話：「3名仔女對投資都冇濃厚興趣」。睇嚟歐洲股神對未能將自己畢生絕學傳授畀下一代，會係佢人生一個最大嘅遺憾。
仔女對投資冇興趣
波頓投資成績斐然，想做佢徒弟嘅人睇怕可以排滿成個中環，但估唔到3名仔女對投資都冇興趣，冇一個想繼承老爹嘅衣鉢。波頓好感慨咁話，最大嗰兩個仔女已投身社會工作，孻仔就仲喺大學讀書，雖然佢仲未決定將來會入邊行，但知子莫若父，波頓估計佢都唔會子承父業，投身投資界嘅機會渺茫。
雖然班仔女冇興趣投資工作，不過波頓都有建議佢哋買基金，當然大部份係投資喺老竇有份揸fit嘅富達基金啦，點都係最穩陣嘅。
寫古典音樂出CD
波頓除咗熱衷投資，另一嗜好就係寫古典音樂，夠晒cool，佢嚟緊仲會推出首張個人音樂CD，預計喺兩個月內面世，由英國Guild出版，CD內唔單止有波頓親自創作嘅聖誕歌，仲有佢專登為個女婚禮編寫嘅樂曲。估唔到歐洲股神仲係位音樂大師。
李華華