現代美容（919）前主席曾裕，舊年因為「健康理由」請辭一切集團職務，改由當時副主席、曾裕老公李守義頂上，上周五集團又宣佈，委任4名新董事，唔知係咪李主席較為後生（年報顯示只有34歲咋），就連一班新董事大部份年紀都30歲未到或者30歲出頭，唔知係咪開會時會同聲同氣啲呢？
集團通告話，由本月10日起，莫顯玉同埋前主席一樣以「健康理由」請辭，辭去執行董事職務，現代美容委任咗朱舒靜、楊靜如、董國磊、黃樹培為執行董事，同日生效。
兩新董事不超過30歲
其中朱小姐年僅29歲，係集團工程、物流、採購及物業部主管，負責新產品發展。負責品牌開發、市場推廣等工作嘅楊小姐，都只不過30歲，家係行政經理兼主席高級助理。兩位小姐都喺美容業有近10年經驗，所以唔好話工字冇出頭。至於董生同黃生，則分別37歲同43歲，董生係現時集團法律顧問兼公司秘書，黃生就係法律顧問。搵兩個律師入董事局，唔知係咪好多法律問題要處理呢？