噚日鬼咁熱，除咗班記者行家遊行遊到身水身汗，朝早亦有過百人喺中環大汗叠細汗咁踩單車。佢哋參加咗綠色和平嘅「氣候英雄單車行」，由中環遮打道立法會外出發，經金鐘道，沿軒尼詩道、高士威道直踩到天后，全程10公里，以呼籲市民少啲揸車，響應9月22日「世界無車日」。
噚日空氣質素麻麻，但政界、醫學界、社會服務界都有派隊參加。公民黨黨魁余若薇一身黑色套裝到場為黨友打氣，雖然佢呢身打扮唔夠sporty，但估計係為咗參加中午嘅記協抗議疆官老屈記者遊行而着成咁。綠色和平就話，截至噚日為止，已經有54間機構企業、4間大學、11間中學承諾支持9.22無車日。