乖女徐子淇嫁入豪門，身為千億新抱嘅爸爸徐傳順，絕對可以安享退休生活，之不過，本身做開審計同管理工作嘅徐爸爸似乎唔想咁早退休，選擇走去香港資源（2882）擔任執行董事，落手落腳投身佢較陌生嘅黃金事業。
金至尊（870）旗下零售業務剛易手畀香港資源，徐爸爸噚日到金至尊分行了解業務，佢話，投資冇局限於邊個行業，最緊要係有冇發展前景，唔識咪去學囉。果真活到老，學到老。
唔排除搵四叔加碼
親家李兆基揼咗2000萬銀閒錢入股香港資源，名牌效應令到股價升到飛起，問到親家有冇提到加碼，徐爸爸話，若果公司做得好，都唔排除有呢個機會，但係徐爸爸上個月走去減持公司股份，而佢嘅回應係：個人投資重新調配，冇打算再賣，亦並非唔睇好呢間公司嘅前景咁話。
金至尊仍然沿用前朝代言人，即係生咗個B仔嘅陳慧琳。徐爸爸透露，打算用幸福女人做主題，推廣珠寶首飾。計落徐爸爸不如搵埋乖女做埋代言人，咁樣咪仲有幸福代表性！