王菲與夫婿李亞鵬日前帶同細女李嫣來港處理證件問題，一家三口順道四出行街掃貨。跟王菲老友鬼鬼的劉嘉玲，前晚更一盡地主之誼請王菲夫婦食飯敍舊，在灣仔福臨門擺兩圍，順道為上月40歲的王菲補祝生日，認真唔話得。
剛在上月8日度過40歲生日的王菲，上周與丈夫李亞鵬及細女李嫣秘密來港，有指王菲此行是回流香港定居，及為3歲女兒李嫣搵名校，但據悉王菲其實只是為女兒處理證件，順道逗留多幾天行街。
梁朝偉未有現身
難得王菲返港，劉嘉玲遂於前晚在灣仔富豪飯堂福臨門宴請好友食飯，及為王菲補祝生日。據悉嘉玲一早訂了兩圍酒席，除王菲夫婦外，更邀請王菲經理人陳家瑛等約20位好友大快朵頤，但嘉玲老公梁朝偉及王菲細女李嫣未有同行。
王菲與嘉玲於前晚7時許便抵達福臨門食飯敍舊，逗留至晚上10時半才離開。李亞鵬見門外大批記者等候時，面上一直保持笑容，相反王菲則一直垂着頭，然後急步登上陳家瑛的平治座駕，直駛往下榻的中環四季酒店apartment。至於狄波拉和夫婿鬍鬚Kong，剛巧亦相約友人在福臨門飯局，二人見到嘉玲和王菲等人時亦有寒暄一番。據悉前晚飯局中還有王菲與嘉玲的麻雀腳，她們席間撩王菲飯局後開枱打牌，但一向愛打麻雀的王菲最終以湊女為由婉拒。
記者昨日致電陳家瑛，問前晚是否嘉玲請客及為王菲補祝生日時，陳家瑛說：「係嘉玲請，佢哋係好朋友，王菲嚟到香港，梗係嘉玲請客啦。我哋大班朋友食飯，仲見到拉姑同好多朋友。」
為嫣然基金留港
對於有消息指王菲回港定居，並搬入月租10多萬的四季酒店apartment居住，陳家瑛否認說：「佢哋最主要係想住得舒服啲，佢哋今次會留耐啲玩，同埋傾吓嫣然基金籌款嘅嘢。」
採訪、攝影：李志明、朱志聰
