鼠王芬同中聯辦九龍工作部部長林武係緋聞男女，因為林武對鼠王芬一直眷顧有加，引起政壇一些八卦之人竊竊私語。噚日鼠王芬喺旺角砵蘭街開新辦事處，林武不避嫌到場力撐，仲委以重任，叫鼠王芬要團結九龍區人士，繼續服務九西，撐佢冧莊嘅味道非常濃厚。
但估唔到嘅係，一向鮮有露面嘅鼠王芬老公，即係城大法學院院長王貴國都罕有現身，仲帶埋兩個囝囝去辦事處開幕禮高調捧場，唔知係咪要力證同太太情比金堅，親身為太座嘅緋聞闢謠？同場到賀嘅仲有鬍鬚曾同林鄭月娥，但佢哋喺呢單緋聞事件之中只屬路人甲之類嘅大配角，所以來去匆匆都冇乜人理。