May姐榮獲母校浸會大學頒發榮譽院士，傳媒界朋友戥佢高興，左丁山在此講聲恭喜恭喜，May姐在電台一做三十年，穩如泰山，攞埋銅紫荊兼JP，有如此地位，傳媒界不多見也。
股市重上二萬一千點，一度高見二萬一千三百二十二點，似乎好好景。有一日到中信海都飲茶，下午一點三個字，竟然見到有人排隊等位，幾乎不敢相信，以為好景重臨㖭，海都噃，你估茶餐廳呀？不過同枱飲茶嘅旅遊L就話呢啲係中午風光啫，晚上就完全唔同樣子，大把空枱等人。隔幾日路過史丹利街，又係下午一點三個字，一間茶餐廳竟然派人在門口拉客，猛叫裏面有位，呢個鐘點，中環人頭湧湧，素來只見茶餐廳爆滿嘅啫，點會餐廳在街頭拉客o架？呢間茶餐廳已是平價餐廳，可能附近一帶競爭激烈之故，生意係比較少啲，今時今日除咗講服務態度，仲要講產品質素，差啲都會俾人唱幾句，你估喺街邊擺個擦鞋檔就會有人幫襯乎，唔擦得對鞋「立立令」，邊度可以留住熟客。
中環擦鞋匠之中，戲院里嗰四位，因發牌事件，梗係最多人留意嘅啦，當政治人物覺得佢地有利用價值之時，就猛咁向傳媒吹風，報紙電視台熱烈報導，過一段時候，呢類新聞「炒作」完畢，就唔會有人出嚟講嘢，傳媒當然亦不再報導。上日飲茶路經戲院里，忽然醒起，究竟四位擦鞋匠有牌未呢？周圍打聽吓，方知上星期四（九月十日）中西區議會已通過食環署之滙報，食環署會向擦鞋匠發出邀請申請牌照函件，六個星期後可以完成發牌程序，經營地點位於戲院里末段，比較接近永安人壽保險大廈，四位擦鞋匠一致同意，原皇后戲院業主（即陸海通）完全不反對，區議員無異議，於是皆大歡喜收場。戲院里因被消防處劃為「緊急車輛通道（EmergencyVehicularAccess）」要諮詢消防處、屋宇署、運輸署、警務處、地政總署、路政署與民政事務總署之後，食環署先至可以下決定，冇話俾議員鬧兩句就可以立即發牌也。