基金或股東為乜要配股,背後有好多原因。散戶最主要睇批貨落入誰人之手,以及配股後股價有冇走樣。如果股價表現仲勁過以前,相信散戶唔會介意。
近兩個月以來,北控水務(371)兩度遭股東PioneerWealth(PW)減持,第一次在7月份以每股1.40元,配售1.8億股,配股完成後,北控水務展開升浪,到8月初更創下52周新高1.84元,其後北控水務跟隨大市調整,跌至1.38元後回穩。
今個月初,PW再以1.47元配售1.54億股,完成配售後,該股至今從未失守過配售價,上周五平收1.62元。
業績前有機炒上
北控水務本周三公佈中期業績,應有憧憬之處。去年12月底止18個月,集團營業額達3.38億元,純利3098萬元,大有改善。
北控水務係大股東北京控股(392)之環保業務旗艦,一直深得眷顧,日後唔排除有更多注資行動,點睇都前景亮麗。PW配售的北控水務股份,估計已落入強者之手,業績公佈前有機會炒上,目標2元,以1.38元止蝕。
方星俠