要感受菲律賓風情，可以周末去皇后像廣場，與一班賓賓聞歌起舞。若要濕身度假，都唔使去好遠，坐個多鐘頭飛機去克拉克就得。今次有breakdance王狄易達、靚仔James@Square聯同麥家瑜（Keeva）、郭穎橋（菠蘿）及港台DJ斌仔等，為了慶祝暑假完結，而齊齊結伴去克拉克狂食狂玩。請勿讓你家中helper看到此報道，否則可能令她大叫"Mom,letmegohome！"
記者、攝影：吳允冲
鳴謝：香港電台
滑水褲提供http://www.xracingsport.com
MakeUp：ReghanWong
喪玩滑水梯
克拉克度假城的主打其實係賭場，但一班大唔透的歌手們越賭場門而不入，亦無懼雨天，直奔度假城內、堪稱全克拉克設備最完善的水上樂園。見到呢個水上樂園，就知啱一家大細來度假，因為度假城除有水上樂園外，更有賭場、高爾夫球場，阿爸阿媽兼囝囝，就可以各有各玩。
入到酒店還未整頓行裝，達仔先掏出私伙水槍，諗住狙擊一班女歌手，卻被菠蘿識穿詭計，兩個人為咗一支水槍混作一團。另一邊廂，James已急不及待除衫一支箭衝了上滑水梯，滑水梯共有3條，眼睇都有4層樓高，由梯頂滑到底都要幾秒。玩唔夠喉，James又拉埋達仔去玩，發覺原來坐住水泡滑落嚟更快更刺激，high到震！愛玩的菠蘿則去嬉水池玩伏匿匿，最後與達仔兩人雙雙仆低見紅，最後要忍着淚離開。「仲有海盜船、飄浮河……好多嘢未玩呀……」原來在酒店的Spa外，又有另一個泳池區，相對水上樂園的熱鬧，這邊的設計就比較悠閒，有標準池、溫泉池等，又可以在池畔曬太陽，但這班大細路，居然拿出一大袋自製水彈互掟！
FontanaLeisureParks
地址：C.M.RectoHighway,Clarkfield
網址： http://www.jimei.com.hk
水上樂園入場費：約$50
韓菜慰高球手
大戰過後，大食王James叫肚餓，達仔就拉大隊去度假城內的韓國餐廳開餐。點解去到菲律賓要食韓國菜？原來好多韓國人都鍾意來克拉克度假打golf，他們不能一日不吃泡菜，所以克拉克內有不少韓國餐廳，像這間Obaltan，在韓國現有十幾間分店，味道跟在韓國食到的一樣咁正宗，達仔都讚牛肉好食到飛起，不吃辣的Keeva，也捧住碟炒粉絲食唔停口。
ObaltanKoreanBarbecueRestaurant
地址：2/F,ClubHouse,FontanaLeisureParks
木炭燒烤平到笑
6呎高食極唔肥的James又話未食飽，於是大夥兒到克拉克最大的商場SMCity搵食。原來狄易達好識路，話克拉克人最愛是燒嘢食，於是他帶我們到一間設計得好有熱帶風情的地道餐廳，還用上茅屋設計。未入門口，已經聞到燒烤傳出來的香味，真正用木炭炭燒的牛扒，在香港的餐廳都不可能吃到。燒牛扒外表炭黑色，牛味濃郁，但肉質較韌。一班DJ仲向侍應請教如何用菲律賓話點菜，但我學極都似是黐脷筋，最易係叫通菜「KongKong」，其他的請上《蘋果》網睇片看真人發聲。食飽飽，Yellow話要一杯甜品HaloHalo才算圓滿，裏面有西米、椰汁等等，味道超甜！
IkabudPagkaingPinoy
地址：Lot9&11,Blk.20,RichthofenSt.,HensonvilleSubd,Malabanias,AngelesCity
軍營變度假天堂
步出餐廳，雖未到12點，已有馬車載我們返度假城。度假城前身是美軍基地，改建後變身度假勝地，連無記《賭場風雲》都在此取景。我們一班人齊齊住在美式平房，好似中學生去camp咁熱鬧，夜晚講鬼古玩大整蠱……想知箇中爆笑事，記住本星期六收聽香港電台第二台，由斌仔、Morle、紫龍、的神主持的《尋常事認真做》，或可登上 http://teenpower.rthk.org.hk收看片段。
Dos&Don'ts
囗必飲芒果菠蘿汁
係人都知菲律賓呂宋芒果味香又甜，做芒果乾好食之餘，用來榨汁就算唔加糖都夠甜。但菠蘿郭穎橋就發現，原來菠蘿汁仲好飲，清甜又creamy，仲無芒果汁咁濕熱㖭。
出門提一提
簽證：持BNO或特區護照均毌須簽證。查詢：28238500（菲律賓領事館）
機票：乘宿霧太平洋航空來回克拉克，票價$660起。查詢： http://www.cebupacificair.com（宿霧太平洋航空）
貨幣：1港元約兌6.22菲律賓披索（文中價錢已折算港元）
電壓︰220V，兩扁腳插座
下周菲律賓克拉克
有雷雨，22-31℃
