航天控股（031）半年度純利翻半番，預期PE得單位數，買定等爆邊。航天09年半年度（6月底止）純利翻近半番到1.4億銀，幾乎追貼08年全年度純利1.44億銀，業績靚爆鏡。航天近年積極拓展祖國科技園綜合開發項目，其中「上海航天科技產業園」已經有6個項目入園，為集團提供工業項目以外、額外收益貢獻。保守計數，航天09年下半年純利，只係keep到上半年一半水位，全年度純利2.1億銀，PE落到9倍單位數。又隨住集團「深圳航天國際中心」及「海南航天發射場配套區」陸續投入服務，中線收益兼備爆升動力，PE有望落到更低單位數。
家陣紅籌指數09年度平均PE，係講緊15倍，航天平咗一大截。計計數，航天重返1蚊，現價0.78元要升28%，預期PE得12倍；航天要追上紅籌指數PE水位，現價係要翻半番，到1.20元。
看通價殘兼落後
看通集團（1059）1年累積跌幅達到58%，相對07年尾高位，跌幅係講緊76%。又掉頭計數，看通阿媽冠軍（092）由3月到家陣升咗幾乎1倍，看通同期升幅，講緊得29%，看通價殘兼超級大落後。
看通連埋今年5月供股後嘅NAV0.69元，現價0.204元，折讓高達70%。看通同阿媽冠軍一樣，09年半年度業績倒退，但仲有勁大折讓墊底，冇理由跑輸阿媽一大截。博看通折讓係咁易收窄到60%，價見0.276元，現價要升35%。
錢雋