徐子淇為夫婿李家誠誕下第二名囡囡晞兒後不足四個月，前晚她現身ball場時已極速收身，面龐及手臂等贅肉統統byebye，更穿起性感露背裙示人。子淇笑言跟隨她多年的babyfat也不見了，透露多食奶類乳酪食物能快點減磅，又笑言晞兒成了17磅重的巨B，更搞笑地指囡囡的樣貌似鄭則士。
千億新抱徐子淇與夫婿李家誠前晚現身灣仔君悅酒店，出席社交雜誌《HKTatler》的周年ball，同場還有賭王千金何超瓊、霍震霆及其次子啟山、張天愛與夫婿羅素等人。原來子淇與李家誠是代表「股神老爺」李兆基攞獎，子淇身穿英國時裝品牌Temperly的金色珠片露背晚裝，並配以張王幼倫設計的Carnet鑽飾示人。
「冇鈣質冇咁易瘦」
現場所見，生完第二個囡囡晞兒僅4個月的子淇，明顯已極速收身成功，面龐及手臂均不見贅肉，連子淇自己也笑說：「冇晒啲babyfat。」問她瘦了多少磅時，她說：「我都冇磅，唔想日日磅住，好大壓力，家食嘢健康咗，水腫都會肥幾磅，食奶類同乳酪都會瘦得快啲，女人冇鈣質冇咁易瘦。」
李家誠也笑說：「佢應該係同佢未生之前嘅磅數。」問子淇是否因湊B辛苦故激瘦？她說：「湊B都幾辛苦，抱佢都瘦，似做gym，同埋每次生我就肥，不過之後會瘦番。反而Martin（李家誠）就陪我陀B時食消夜，之後佢瘦唔番，家都重咗成10磅。」
「佢家已經17磅」
問到子淇其二女晞兒的近況時，她即笑道：「佢家已經17磅，可以着到八個月嘅BB衫，仲可以share家姐啲衫，佢肥到好得意，好可愛，望望吓佢覺得佢似鄭則士。」又透露將帶4個月大的小晞兒上音樂班，她說：「等佢大個會有perfectpitch（絕對音準），唔會走音，有音樂感，都係行番家姐條路。」
採訪：梁錦雯 攝影：陳慧安