呢套暑期電影，估唔到9月開學即推出影碟版，好有效率！齋睇預告片，大有可能認為《再生號》只係一套加插眾多CG片段，增添幾分詩情畫意嘅愛情鬼片罷了；佢究竟屬邊一類型？Bonus有劉青雲等一眾演員嘅專訪，但似乎連佢哋自己亦一頭霧水。答案係乜？不如買隻碟睇吓啦！
記者：陳國輝
山頂纜車再生
玩CG，一向都唔係港產片強項，之但係「再生號」偏偏有成5分鐘劇情係由電腦動畫製作出嚟，睇落真係幾堅！眾多CG片段入面，最爆相信係劉青雲搬家一幕，佢當時瞓響梳化，突然間飄起，再連埋屋內所有傢俬一齊由港島半山區「飄」到去墳場，逼真程度幾高o架！
另一要讚嘅CG位，就係佢將山頂纜車重新「化妝」，變成由亡靈通往投胎嘅「再生號」列車，雖然佢將CG結合真人嘅效果尚算唔錯，但係以纜車作為靈界交通工具，只能講聲大吉利是咩！
塌簷篷嚇餐飽
睇CG效果固然係呢隻碟重要賣點，但今次出埋Blu-ray版，更支援TrueHD音效，梗係要試埋靚聲啦！雖則《再生號》屬文戲一部，唔打、唔殺，但有兩幕劇情嘅聲效幾乎俾佢嚇死；首幕係開頭嘅炒車位，畫面一黑，幾秒後突然傳出勁響撞車聲，再過一陣先出現番畫面，演繹方式認真特別；第二幕係旺角花墟突然間塌簷篷，「轟隆」一聲雖然僅僅2至3秒，但論聲音震撼程度真係會嚇破膽。唯一不足，算係全套戲嘅背景音樂太少，聽來聽去都係嗰隻，有啲悶。
寫小說重遇丈夫
再生？常理中根本係冇可能嘅事！故事發生於十年前，任職法官嘅湯有亮（劉青雲飾）本來擁有美滿家庭，過住小康式生活，但因一次嚴重交通意外，導致大女失明，亮更返魂無術。十年之後，妻子（林熙蕾飾）仍憶夫成疾，為求解脫傷痛，佢哋開始寫一本能夠令丈夫「再生」嘅小說，好讓一家人團聚。
Bonus訪問 青雲一頭霧水
講咁耐，究竟《再生號》係一套鬼片、文藝愛情抑或懸疑式電影？暫且賣個關子，但最搞鬼嘅係，睇完Bonus先知，其實連劉青雲等一眾主角亦唔知自己拍緊邊類型電影。講番特別收錄部份，除製作特輯，其餘係好例牌嘅預告片以及電影檔案室，後者更提供中英文版本，用文字交代故事背景及劇組人員名單。老實講，呢部份絕對可有可無，翻轉DVD盒已經睇到啦！如果想睇CG製作過程，長達十幾分鐘嘅製作特輯或可滿足你。
Profile
片長：86分鐘
語言：粵、國語
畫面：16：9
音效：DigitalDolby、Surround5.1、TureHD（Blu-ray）
特別收錄：製作特輯、本片預告、電影檔案室
