記者帶點好奇的問：「乜唔係死咗先會搞原稿展o架咩？」李香蘭哈哈大笑：「係o架咩？」記者又問：「你知唔知李香蘭係邊個？死咗o架喇！」李香蘭又笑：「後來先知，我係因為少爺占個節目先改呢個筆名。」年輕畫家Rainbow以筆名李香蘭創作了一部紀實漫畫《上．下禾輋》，不足兩月售出逾千本！未算巴閉，有藝術團體請她開辦個人原稿展，認真厲害。
銷量衝破一千本
這陣子逛書局，總有機會留意到這部貌似童話的漫畫書。《上．下禾輋》作者是23歲的城市大學創意媒體學院畢業生Rainbow，她用鉛筆、水墨，再加點水彩，記敍了沙田二百年老村禾輋村的人和事。作品獲得年輕作家創作比賽獎項，主辦單位代為出書；7月至今，銷量已衝破一千大關。
Rainbow是個小村姑，禾輋村是她家鄉。有一天，村裏一棵木棉樹突然被人斬件，激發起小村姑為家鄉立傳的靈感：「棵樹仲好健康，成四十幾年，不過業主要發展，就咁切開咗一份一份。細個時我哋會執啲木棉花嚟玩，好開心。」Rainbow意識到，有些東西常伴左右本是理所當然，但原來也可以瞬間消逝。於是她決定為禾輋村創作一部傳記，訪問全村居民，留下圖文記憶，算是保育老村。
李香蘭這筆名來自商業電台DJ少爺占廣播劇一個男仔頭角色，與抗日時期日裔女星山口淑子毫無關係。男仔頭Rainbow從前並不開朗，平時不會與村民打招呼，為了創作《上．下禾輋》，才透過媽咪與村民打開話匣子：「有個村民叫老虎仔，成日坐喺度飲啤酒，我以前唔敢同佢傾偈，點知佢好願意同我分享，一講就講咗個幾鐘。」
嘆香港人太緊繃
香港人太緊繃了，應該放鬆點。Rainbow從《上．下禾輋》的創作過程中體會到：「其實好多人一直等緊同人傾訴，只不過大家個保護膜太厚，忘記咗愛。」小村姑把禾輋的愛發揚光大，賺得一群中年fans的愛戴：「我有次出席簽名會，搵我簽名嘅，唔係我朋友就係五、六十歲嘅讀者。仲試過有兩個姨姨揸住本書上來我屋企搵我，話要同我傾偈。」
想找李香蘭聊一聊，不妨於9月19至10月18日前往藝鵠，參觀李香蘭《上．下禾輋》原稿展，查詢請電：28934808。記者蔡元貴