香港女性越來越遲婚，連帶出產更多高齡產婦和三人行小口家。但Jessie卻反其道而行，熱愛孩子的她18歲結婚生仔，往後平均每年生一個，到現在懷第六個孩子，才不過24歲。七年抱六不但連徐子淇都望塵莫及，更厲害是除三女交嫲嫲湊外，其餘全部自己照顧，多產媽咪當之無愧。
記者：林佩婷
攝影：譚盈傑
全部開刀 驚險分娩
每當朋友結婚，總會祝人三年抱兩，Jessie卻挑戰人體極限七年抱六，但原來頭幾胎都是意外：「我好鍾意小朋友，既然生開，就決定一口氣生埋佢，否則等幾年待懶了就唔想生。而且幾兄弟年紀相若，一齊返學，感情都好啲。」
據聞孕婦最多只能開刀三次，徐子淇開刀兩次，醫生都建議她休息一年才再生。Jessie話最初都想自然分娩，但最後因情況不許可要開刀，自此四胎全部開刀，腹中阿六亦將會是開刀。由於生第一胎才18歲，最初唔識驚，但手術過後發炎，又正值沙士，故令她對醫院有陰影。「由第三胎開始醫生話會有危險，之但係又生到喎！到第五個直頭驚失血過多，生完可能要入ICU，為穩陣要先輸兩包血，咁我先至識驚。」但正因恐懼，每次生完第二日就一定要出院，否則便睡不着。
先苦後甜 無乜嘢做
對於早婚早生，她自有見解，就是先苦後甜。「其實只要調轉諗就無問題，三四十先生仔嘅，人哋仲讀緊幼稚園，我嘅小朋友就已經讀完中學甚至大學！」之但係，五六個細路同一屋簷，家住才五百呎的東涌屋邨，肯定嘈到坼天。但Jessie的先苦，只有生那一刻跟頭兩年，之後便如魚得水，姐弟間從不吵架，自動波飯前洗手飯後收碗。拍攝當日去公園玩到癲，但媽咪一聲令下返屋企就齊齊乖乖回家，沒哼半聲。連Jessie都話自己無咩做。「日頭佢哋要返學，得番1歲嘅五女要湊，又有工人姐姐幫手清潔煮飯，到放咗學家姐會照顧細佬妹，自動自覺洗手做功課，而大女我一星期只幫佢睇一次功課，佢依然拎學業優異獎。有時我都會問佢哋點解唔扭我買玩具，佢哋就話唔使喇……」
六個就夠晒數
生吞硬剝，Jessie唯一的烏龍事是湊大女時欠經驗，餵了一年奶才知可以食吓糊仔或粥仔。但畢竟，湊一個小孩要四百萬，乘六喎?!幸好丈夫Keith貴為SalesManager，暫時四個小朋友齊睡一房，一張碌架床加鋪地蓆，基本生活經濟也不大有問題。大女學珠心算、二仔學英文、四仔學畫畫。至此，我真的沒話說，只餘這最後問題：最終想生幾個？「生埋呢個就收工喇。」Jessie一貫的陰聲細氣淡然吐出。
