鄭大班寫長文講申請入讀美國大學新情報，話申請柏克萊，取錄機會渺茫，有參考作用。好多年不通音訊嘅校友最近傳來訊息，好似有啲憤憤不平。咦，人在美國，一家四口，有高尚職業，收入可人，住一間獨立屋，位於灣區，呢間屋若是位於尖沙咀河內道，應該起碼值一億港元。生活如此，有何不滿呀，原來A君多年來苦心栽培兩位公子入讀柏克萊與UCLA，不惜搬屋到良好校區，花錢畀兒子學音樂、打網球、做義工，除英文外，當然學埋中文仲有西班牙文，更加唔少得與太太日夜監督兒子做功課，華裔子弟，邊會在學校考試輸蝕畀人呀！
中學GPA攞到近乎四分咁又點？入學申請寫到極好，咁又點？A君兩位公子分別舊年與今年都係入唔到柏克萊與UCLA。雖然都係讀UC，A君條氣好唔順。左丁山知道之後，叫另一位灣區朋友勸佢睇開啲，亞裔學生在加州係非常非常難入柏克萊與LA嘅，因為呢兩間學校收生唔睇成績，而睇學校評估，亞裔學生與亞裔學生爭，黑人學生與黑人學生爭，拉丁裔與拉丁裔爭，目標係學生多元（studentdiversity），如果淨係睇成績嘅話，呢兩間加州大學分校會變成加州亞裔大學都似。《華爾街日報》好早報道過，UCLA在一個成績超優異之韓裔男生與成績普通之墨西哥裔女學生之中揀，就選咗後者，前者飲恨。理由簡單，韓裔男生雖來自單親家庭，但阿媽有份工，佢間學校係優秀學校；而墨裔女生來自破碎家庭，父失蹤母失業，在一個貧民區嘅差劣中學就讀。評估之下，墨裔女生更值得大學栽培喎，韓裔男生呀，你咁叻，UCLA唔收，使乜驚呀，實有好學校收，咪去聖迭哥分校囉。
咁嘅道理，亞裔學生冇話唔知道嘅，不過A君人在加州，雖然知道，心理上始終唔忿氣，係要想兩兒入讀柏克萊與LA，結果變成一肚怨氣。小記者B知道之後，淡然一笑：「係要入UCLA嘅話，往往失望。當年我以她為第一志願，結果收到第一封拒絕信就係UCLA嘅，令我信心大受打擊，以為自己唔掂㖭！」係噃，小B鋼琴考到演奏級，中學成績永遠第一或第二，但申請UCLA好快就吃閉門羮。好彩，收到第二封大學信，就係芝加哥大學送獎學金引誘佢入讀。香港學生尖子申請美國大學，無謂申請UCLA或柏克萊嘞，以免嘥時間。