【記者夏志禮報道】本地院校近年積極北上發展，不過本地院校到內地辦學，現時必須與內地大學合辦課程，而且面對內地教育政策，以至意識形態的掣肘，港校要獨立辦學可謂遙遙無期。據了解，早前曾倡議於深圳建分校的香港大學，近日正考慮採取折衷的「校區」概念做法，希望搶灘盡早取得大幅土地發展，這樣既毋須考慮教育部的繁文縟節，亦毋須等待港府遙遙無期的河套發展大計。
申請撥地約20公頃
港大消息人士指，包括校長徐立之在內的高層，年內不停與深圳市政府磋商撥地建校事宜，有感建分校一事掣肘太多，校方初步構思以大學校區概念向深圳市政府申請土地，「細地我哋唔會要，起碼都要有20公頃，而嗰間並唔係港大分校，只係大學本部延伸出來嘅校區，只不過唔係喺香港境內，所以唔會喺嗰度另外再起新嘅學院，內裏嘅課程亦唔需要經教育部批准，情況就好似租塊地另外用咁，咁就唔需要考慮太多政治問題。」
他續指，既然是本部的分校區，所有港大生都有機會到校區上課，「家嘅諗法係我哋唔會搬個別學院上去，反而係喺校區設唔同嘅教學大樓，學生就按學科需要決定要唔要去校區，舉例大學4年制之後，學生頭兩年應該會留番喺本部，但係可能修工程嘅第3年會全年留喺校區，因為佢哋本身可能有一個學期要到上海交流，咁就會好方便。」
消息人士表示，論土地及資源，深圳市可謂「大把貨」，問題反而在於市政府對港大有何要求，「我哋嘅回覆係，始終廣東省一帶現時都冇世界級嘅學府，我哋嘅出現一定會帶動附近周邊發展。雖然對方冇要求話要我哋多收深圳生。」他說對方一旦真有多收內地生的要求，資源必由對方負責。
對河套區仍有興趣
除深圳校區外，港大對河套區仍然有興趣，不過現時該地發展仍然未明朗，諸如多少間大學瓜分該地、污泥會否影響建築物等問題仍有待研究；相反，只要深圳政府願意首肯，校區即有望於河套區拍板前完成，屆時更可配合校方於深圳虛擬大學城的科研工作。