迎接十．一全城都要紅，民建聯今個月26號會喺文化中心外舉行《紅色搖滾音樂會》，以搖滾音樂去演繹傳統紅色革命歌，演出歌手、樂隊包括羽翹、DEARJANE同EVER，連老牌Band友夏韶聲都有份。
夏韶聲早前有首新歌《力量》，由於夠「行」而且好激情，幾乎成為社民連非官方黨歌，加上佢首名曲《媽媽我沒有做錯》被視為民運金曲之一，所以夏韶聲忽然河蟹令好多社民連支持者訝異，負責呢個音樂會嘅民建聯黨員黎榮浩話自己都有玩音樂，認識夏韶聲，早前同佢談及有呢個音樂會，雙方一拍即合。
自稱「現實派」歌手
Band友心中多數有團火，夏韶聲團火應該份外「紅」，佢有首新歌叫《大國崛起》，聽歌名都知好啱民建聯聽，黎榮浩亦話因為呢首歌而邀請夏韶聲做嘉賓。《大國崛起》網上有得聽，夏韶聲接受網上電台訪問時承認呢首歌「或多或少讚大陸」，話自己愛國愛港。雖然唱嘅歌充滿政治含意，不過夏韶聲話自己係「現實派」歌手，出新唱片就要出騷做宣傳，好似賣橙小販，「搣開好食、夠甜就得。」