【上月燈神】前幾晚睇緊林峰同陳鍵鋒主演齣嘅N年前舊劇時，趁廣告時段轉台睇FTV，咁啱撞正重播緊上個禮拜六進行嘅TokyoGirlsCollection。有囡囡睇，梗係即時離棄林峰等麻甩仔。TGC雲集日本名模同當紅藝人，見到Angelababy同諸葛梓岐等代表香港出征呢個時裝界盛事，拍落啲日本同埋外國代表度一啲都唔輸蝕，而且現場觀眾嘅反應仲幾熱烈。啲人成日批評Angelababy個樣好人工，但我認為根本冇問題，講真，邊個明星個樣冇執過吖，而喺日本，啲女仔直頭當係化妝嘅一種㖭。Angelababy喺天橋上，望落去同啲日本模特兒冇分別，兼且仲孭咗幾個品牌，咁就證明佢好成功啦！
上個禮拜推介德國勝[-1]，順利幫我攞到連續第3個W。今次唔要德國波，改攻我至愛嘅日本波。清水心跳雖則唔似鹿島鹿角、大阪飛腳同埋川崎前鋒等粒粒星，但勝在實而不華，而且射手岡崎慎司「弗」到漏油，呢場對住下游嘅大宮松鼠，實食冇黐牙。文：青蛙仔
近5場往績：WWWLL
主客和：清水心跳勝
心得：心跳射手岡崎慎司弗爆