還記得上年曾到奧脫福球場觀賞曼聯作賽，與一眾紅魔迷一齊歡呼，的確畢生難忘，最緊要氣氛好，睇波就自然份外投入。嚟緊20號又有機會熱熱鬧鬧睇波，而且有過千球迷，一齊睇曼聯對曼城的打呲大戰，戲碼相當矚目，令人期待。我還會在現場與大家近距離接觸兼大玩遊戲，希望大家多多支持。不過今晚的英超賽事都同樣不容錯過，曼城主場迎戰阿仙奴。
兩叛兵倒戈成戲肉
兩隊都氣勢如虹，不過就以曼城成績較佳，於聯賽已保持3場全勝兼不失1球。最想看到的戲肉，是艾迪巴約及高路托尼，遇上昔日隊友與恩師雲格，但兩位卻不容放軟手腳。
上季就是艾迪巴約攻入兩球，助兵工廠擊敗曼城，如今角色依舊，只是身份不再。曉士都認為二人倒戈，表現必定會更突出，高路托尼亦會繼續戴上隊長臂章；而泰維斯剛於世盃外圍賽扭傷了膝蓋，令曼城缺少了一把尖刀。不過曼城在主場球迷助威之下，相信可再下一城。
開季不被看好的兵工廠，卻踢出爭氣波來，令人刮目相看。可是上場對曼聯，先勝後敗下，陣腳大亂，似乎處理逆境波依然缺乏信心，今場作客確有暗湧。
文：依雯
nowSports主持
貼士：
主客和：星期六30曼城勝（2.7）
電郵：[email protected]