【上月盟主】上周命中日乙聯，今次再向東瀛進軍，不過就跳一級揀日職聯比賽，博廣島三箭主場唔留手，大炒剛喺日聯盃出局嘅橫濱水手，主W同讓球主客和「主勝」可齊齊出擊。
三箭呢支升班馬今季唔講得笑，完成超過三分二比賽，仍然穩站前3名，雖然距離榜首嘅鹿島鹿角有成10分，奪標機會唔高，但近年日聯都興後上，3連勝嘅三箭唔會喺呢一刻放鬆；睇番國際賽期對三箭冇影響，森崎浩司、森崎和幸、佐藤昭大分別因病、傷缺陣外，基本陣容仍強，好似近期頻頻入波嘅佐藤壽人同高柳一誠。
水手防線千瘡百孔
相反水手就問題多多，後防精神領袖中澤佑二貴為國家隊隊長，飛到去荷蘭踢兩場太公波，坐飛機坐到頭暈；而國際賽期間，水手又要兼顧日聯盃準決賽，次回合不單被川崎前鋒迫和，出線夢碎，門將飯倉大樹又攞紅牌，今仗停賽，睇嚟水手後防唔多穩。表面睇水手近期聯賽戰績可人，已經7場不敗，但睇一睇對手，贏大宮松鼠、京都不死鳥兩支下游球隊，甚至對榜尾分子柏雷素爾同千葉市原都贏唔到，認真羞家。水手首循環主場都以2:4大敗予三箭，今次更加冇地利，點要得落手？
法甲升班馬大戰和波格
下晝食完壽司，夜晚就試吓法國蝸牛，法甲就有場升班馬大戰，由蒙彼利埃主場對朗斯；兩隊開「咧」都好對辦，蒙軍4戰取得2勝2和，朗斯除咗揭幕戰輸畀波爾多外，其餘3場都攞到分，論人腳，朗斯更加可以秤高啲，原本對朗斯讓球主客和「客勝」有信心，但賠率唔多，既然兩強相遇和味濃，直頭就揀個主客和「D」更實際。文：牽牛
結餘＄101,317
本金$100,000（上周賺蝕：+8,159）
近5場往績：WLLWL