【新宿直擊】工欲善其事，必先利其器。o靚模周秀娜揮軍強攻電車男之國日本，既要與Angelababy爭一日之長短，又要跟地頭蟲o靚模抗衡，要插旗先要整靚自己。她早前到東京工作期間，便抽空光顧位於新宿的24小時潮人商店「激安之殿堂」，物色化妝品及潮流玩意，自我增值。撰文：王連連
繼Angelababy（楊穎）進軍日本模特兒界後，一班香港o靚模一窩蜂效法，在書展響朵的周秀娜也於早前跟一間日本經理人公司簽約，正式加入這個最多電車男的競爭市場。上星期她更小試牛刀，參加在東京舉行的大型服裝騷「TokyoGirlsCollection2009A/W」。雖不及Angelababy搶眼行五套衫，但自創飛吻跟東瀛觀眾打招呼也挽回不少聲勢。
「係咪出事嗰間？」
周秀娜在日本陸續接到工作，已計劃在日本推出寫真集，此行更接受數間雜誌訪問。她每次停留日本，因工作排得太密而未能盡情shopping，不過位於新宿的潮人店舖「激安之殿堂」是24小時營業，成為了她的救星，不過當日她甫到店舖，即問該店是否衞詩出事（於日本發現藏毒）那一間，她說：「我最鍾意食完飯去行呢間舖頭，佢24小時唔閂門，幾夜嚟睇都得。而且呢度好多嘢睇，好多扮靚用嘅嘢。最犀利佢哋乜都有，扮靚嘅化妝品、得意公仔衫、名牌手袋，連內衣褲、晚禮服都有，仲好體貼，有好多唔同款嘅手袋配襯番。」
一日五餐食唔停
激安之殿堂是東京其中一間24小時開設的商店，店內物品琳瑯滿目，令周秀娜大開眼界，尤其特別留意化妝品，最後忍不住買了兩盒假睫毛。別看周秀娜一副弗爆身材，其實她也很愛吃東西，她說：「我鍾意去澀谷109買衫，亦都好鍾意喺日本周圍食嘢。我可以一日食足五餐，壽司、拉麪同埋呢度嘅漢堡包都鍾意食，真係行到邊食到邊。」
記者陳順禎新宿傳真
《激安殿堂掏8寶》
Monchhichi
這間店門外擺放了很多不同公仔的衣服，以供一眾愛「扮鬼扮馬」的人選購。周秀娜甫到門口已經撲向櫃前。雖然剛下班吃着飯糰，仍要看一下她最喜歡Monchhichi的造型服。她說：「好多得意嘅公仔衫，我好鍾意Monchhichi嗰套，真係好想買。」
叮噹百寶袋
周秀娜是後生女，當然也會被公仔吸引，店內很多叮噹貨品她也特別留意，除了叮噹眼鏡座外，她對叮噹的百寶袋型散銀包最感興趣，更忍不住要試用，但玩完一輪最後她沒有買回家。
內衣堆成山
女性恩物特別多，周秀娜見到「胸圍山」，也忍不住多看幾眼，她讚賞連內衣褲的款式也那麼多，覺得有點花多眼亂，她更拿了一個較性感的黑色喱士胸圍研究。
速配晚禮服
看完內衣，一轉身周秀娜便見到一排掛滿了女裝晚禮服，她說：「好勁呀，連晚禮服都有，邊個要去派對可以即刻買，仲有埋手袋配襯，真係好細心喎。」
眼鏡多花款
眼鏡和太陽鏡也有很多款式，周秀娜拿着不同款式試戴，其中她刻意試戴平光鏡，她說：「睇吓我戴呢啲眼鏡會唔會似老師呢？同埋呢度有好多款太陽眼鏡，我就最鍾意大烏蠅鏡，可以遮住全對眼，本身我自己都有一副。」
魔髮小王國
保持百變形象，令自己變得有新鮮感。周秀娜工作上間中也要改造型，她見到店內有假髮專櫃，即研究一番，她說：「我之前做嘢，試過要改髮型，我就用過齊蔭嘅。呢度仲有好多唔同款式，想點變都得。」
平買假睫毛
最近周秀娜開始自己學習化妝，當見到假眼睫毛價錢比香港更便宜，即投入地揀選，最後買了兩盒盛惠160多元。她說：「平時都有化妝師幫我搞，但家我開始學自己化妝，所以就留意呢啲嘢多咗。我發現呢度平過香港，梗係要買番啲返去，而且好多款。」
窩心名牌袋
店內其中一個專櫃，放滿了名牌手袋，周秀娜很驚訝地說：「嘩，呢度連名牌手袋都有，真係乜嘢都有，果然係好犀利呀。呢度仲寫住專為中國遊客而設，真係細心喎，哈哈……我點解知道佢哋咁寫，因為呢度係寫住中文囉，不過我唔會買喇，因為我唔識分真假。」
話你知：激安之殿堂真正雜貨
周秀娜光顧的「激安之殿堂」，是著名的雜貨舖，在日本有超過130間分店，售賣的貨品真的非常「雜」，由零食、藥品、化妝品，到文具、玩具，甚至電器、鐘錶、名牌手袋、珠寶首飾一應俱全。而且店舖年中無休，24小時營業，最適合夜鬼流連磋跎時間。今年2月衞詩與關楚耀藏毒斷正的地點，正是位於澀谷的「激安之殿堂」。